مرۆڤ لەكاتی ڕەفتارەكانی رۆژانەی زۆرجار لەلایەن خەڵكەوە قۆرخ دەكرێ و بە كەسێكی گێل لەقەڵەم دەدرێت و بە چاوێكی دیكەوە سەیر دەكرێ و لە كەسانی دیكەی ناو كۆمەڵگا جیا دەكرێتەوە.
ئەو كە لەپاڵ دیوارەكە وەستابوو و لەبەر خۆیەوە دەیگوت " چەند سەیرە ئەگەر كەسێكی قسە خۆشی خەڵك بە گێلت دەزانن" ئەمە قسەی (هۆگر ئەسعد)ی تەمەن (21)ساڵە، هۆگر باسی ئەوەشی كرد كە " من زۆرجار دەمەوێ لەخەڵك بچمە پێش، بەڵام ئەو خەڵكە بە كەسێكی نەزانم دەزانن و زۆرجاریش قۆرخیان كردووم"، ئەو كە بەنائومێدیەوە دەیڕوانیە ژیانی خۆی، ئەویش بە هۆی ئەو رەفتارە نامۆیانەی خەڵك كە لەبەرامبەری دەیكەن.
شایەنی ئاماژە پێكردنە لەناو كۆمەڵگای كوردی سەدان كەسی دیكە هەیە بەدەست ئەو دیاردەوە دەناڵێنن.
(ساكار قادر) قوتابیە لە یەكێك لە ئامادەییەكانی شاری هەولێر سەبارەت بە دیاردەی قۆرخ كردن گوتی "بەداخەوە ئەو دیاردەیە ئێستا لەناوەمە زۆربووە و بەتایبەتی لەناو پۆلەكەی خۆم زۆر هەستی پێدەكەم"، ساكار لە درێژەی قسەكانیدا نموونەی بە پۆلەكەی خۆی هێنایەوە و گوتی " ئێستا لەناو پۆلەكەی خۆمان چەند قوتابیەك هەنە زۆر فەقیرن و زۆرجار كە قسەدەكەن هاوپۆلەكانیتر قۆرخیان دەكەن و زۆرجاریش ئەو قوتابیانەیان بە گێل زانیووە، من خۆم چەند جارێك لەسەر ئەو رەفتارانەی هاوپۆلەكانم كێشەمان هەبووە لەوە كە نابێ ئەوان وارەفتار لەگەڵ ئەو قوتابیانە بكەن". (چەتۆ ئەحمەد) قوتابی زانكۆی سەلاحەدین - كۆلێژی ئەدەبیاتە، سەبارەت بەو دیاردەیەوە گوتی " قۆرخ كردن و بە گێل زانینی ئەوی دیكە هەڵەیەكی گەورەیە كەوا لەو مرۆڤە دەكات هەست بە شكانەوەیەكی گەورە بكات و لە رووی دەروونیەوە هەست بەنەقس بكات، ئەمەش ئەو مرۆڤە بەرەو دەرونێكی رووخاو دەبات"، چەتۆ خۆی كە قوتابی بەشی كۆمەڵناسیە لە رووی كۆمەڵناسیەوە ئەو دیاردەیەی بە دیاردەیكی مەترسیدار دانا لەناو كۆمەڵگای كوردی، هەروەها چەتۆ باسی ئەوەی كرد كە " كۆمەڵگای كوردی بەتایبەتی پیاوەكان ئەو رەفتارەیان تێدا بەدی دەكرێت، نموونەش لەوە زۆرجار لەناو كۆمەڵە كەسێك یان مەجلیسێك دەبینن ئەو كەسەی بەگێلی دەزانن ئاماژە بەناوی دەكەن و كاتێك دێتە لایان ئەوان یاری ئەتاری دەزانن دەڵێن ئێستا بۆخۆمان كاتەكە بەو گێلە بەسەر دەبەین".
(هاوژین سادق) قوتابی زانكۆی پزیشكیە، سەبارەت بە هەبوونی ئەو دیاردەیە لەناو كۆمەڵگای كوردی وتی" بەڵێ ئەو دیاردەیە لەناو كۆمەڵگاكەمان زۆرە من لەنزیكەوە هەستم پێكردەوە ئەویش لەسەر دەستی خزمە نزیكەكانم كە زۆرجار گاڵتە بەو خزمانە دەكەن كە پێیان وایە قسەكردن لەگەڵ ئەو كەسانە كات بەسەر بردنە"، هاوژین نموونەی ئەوەی هێنایەوە كە " من رۆژێك لەناو چەند كچە خزمێك دانیشتبووین كچە پوورەكەم فەقیر دیارە، كچە خزمەكانم دەیانویست قۆرخی بكەن و پێی رابوێرن من لەگەڵیان كردمە كێشە كە نابێت بەو جۆرە رەفتار لەگەڵ كچە پوورەكەم بكرێت ئەویش وەكو ئێمە مرۆڤە نابێت ئیستغلال بكرێت.
دەروناس (سۆران سابیر) لەبارەی ئەو دیاردەیەوە گوتی " ئەو دیاردەیە لە كۆمەڵگایەكەوە بۆ كۆمەڵگایەكی دیكە دەگۆڕێت، هەروەها لە كەسێكەوە بۆ كەسێكی دیكە دەگۆڕێت، هەموو مرۆڤێك بەشی خۆی ئینسافی تێدایە و زۆرجاریش ئەو ئینسافیە لەلایەن خەڵكەوە ئیستغلال كراوە"، سۆران لە درێژەی قسەكانیدا ئاماژەی بەوە كرد و گوتی " زۆرجار سادەیی مرۆڤ لەلایەن كەسانی دیكەوە قۆرخ دەكرێت و بە كەسێكی گێلی دەزانن نموونەش لەوە لەكۆمەڵگای كوردی بەرجەستە دەكرێ"، سۆران ئەوەشی نەشاردەوە كەوا كەسانێك لە رووی دەروونیەوە نەقسی ئەوەیان هەیە كە ناتوانن كۆنترۆڵی خۆیان لە بەرامبەر كەسانی دیكە بكەن، هەر بۆیە ئەو كەسە ئەوكاتانە بە دەرفەت دەزانێ و ئیستغلالی دەكات.