ئەم بابەتە رۆژی 27/12/2009 لەماڵپەری (..................) لەگۆشەی گفتوگۆی شارستانی لەچوارچێوەی (مافی ئافرەت و بەیەكسانیكردنی تەواوی لەهەموو رووێكەوە) بڵاوكراوەتەوەو، كاردانەوەیەكی بێ وێنەی لە دونیای نووسەرانی عەرەبدا دروستكردو بووە مایەی گۆڕێنەوەی چەندین بیروبۆچوون لەسەر بابەتگەلێكی وا، ئێمەش لە (تاو)ی كۆمەڵایەتیدا بەمەبەستی زانینی كاردانەوەی بیرۆكەیەكی لەم بابەتە لەسەر ئاستی نووسەرانی كورد و كۆمەڵگای كوردستان بەگشتی و رادەی قبووڵكردنی بەیەكسانی كردنی ئافرەت لەو روانگەیەی نووسەر دەیوروژێنێ دووبارە بڵاویدەكەینەوەو چاوەڕێی بیروبۆچوونەكانین، هیوادارین تەنها لەرووی لۆژیكەوە بابەتەكە هەڵبسەنگێندرێ و وەڵامی بدرێتەوەو خۆمان لەهەموو جۆرە هەڵچوون و سۆزێك بپارێزین كە بۆ نەریت و رێسا شەرعییەكان هەمانە.
نووسەر بەوە دەستپێدەكات و دەڵێ: كەواتە رێگەم بدەن با لەگەڵتاندا بدوێم، رێگەم بدەن با بەهەوەسی خۆم هەڵیانبژێرم وەك ئەوەی حەزەكانم دەیانەوێ، لێگەڕێن با لەهەموو شێوەیەك و لەهەموو قەبارەیەك هەڵیانبژێرم، بایەكێكیان سوورە و بێت یەكێكیتریان ئەسمەر، باڵا بەرز یاخود كورت بێت، لێگەڕێن با لەهەموو نەتەوەو ئایین و نەژادو وڵاتێكدا هەڵیانبژێرم، بەڵینیشتان پێدەدەم كە خوشەویستی و تەبایی باڵ بەسەر ئەو خێزانەدا بكێشێ، دڵنیابن شەڕی ناوخۆی پیاوان روونادات، چونكە یەكانەكە ئافرەتە، یاسایەكی دەستكردم بۆ بێننە كایەوە یاخود یاسایەكی دیكەی ئاسمانیم بۆ شیبكەنەوەو بەندێكی نوێم لەنێو فەتواگەلێك و حەزو ئارەزووێك بۆ دروستبكەن، ئەو حەزانەی كە لەپڕێكدا بەبێ هیچ پێشینەیەك لەسەری كۆك دەبن.
جا هەروەك بەبێ هیچ بەهانەیەك پەلكێشی حەزو ئارەزوو سیخە و فرێندزو و هاوینەهەوار و مسیارو چەندین جۆری نالەباری ژن و مێردایەتی كراوم، رێگەم بدەن با منیش لەلایەن خۆمەوە پەلكێشی چوار مێرد بۆخۆم بكەم.
ئا بەمشێوەیە جارێكیان بانگەشەی مافی خۆم كرد بۆ فرە پیاوی بەهەمان یاساو عورف و عادەتی فرەژنی، كەچی ژنان بەر لەپیاوان ناڕەزایی خۆیان دەربڕی، ئەو ژنانەش پتر كەژنیان بەسەرهاتووە لەو ژنانەی كە تاقە ژنی پیاوێكن، هەروەها ژنان پتر لەكچۆڵان ناڕەزایی خۆیان بۆ ئەم هەڵوێستە دەربڕی.
پیاوانی ئایینیش وتاری زۆریان نووسی و پرسیارگەلێكی زۆریان سەبارەت بەفەلسەفەو قوڵایی و ناخی پێناسەكەم بۆ هاوسەرگیری كرد، هەروەها پرسیاری زۆریان وروژاند سەبارەت بە رادەی پەیوەستبوونم بە ئایین، خوێنەرانیش نامەی زۆریان بۆ نووسیم، بەڵام سەیرترینیان نامەی یەكێك بوو كە دەیویست ریز بگرێت، بەڵكو ئەمە خوایە ئەو یەكێك بیت لەو پیاوانەی ریزدەگرن و منیش بەئومێدم ببن بە هاوسەرم .
لەبنەڕەتدا ئەم بابەتە بریتی بوو لەبایەخدان و سووربوونی من لەسەر تاك پەیوەندیی. سەرچاوەكەشی بریتی بوو لەئارەزووی پڕ جۆشوخرۆشم بۆ (استفزاز)كردنی پیاو لەمیانی بزواندنی ئەو هەستەی كە سەرتاپای دادەپۆشێ (كە بەغیلی پێ دەبەم) كە لەنێوان چوار باوەشدا خۆی دەبینێتەوە، ئایا پیاوانی دیكە ستایشی ناكەن..؟ ئایا بەئاشكراو بەنهێنی خۆزگەی پێ ناخوازن.؟
هەرچەند ئەم پرسیارە دووبارە دەكەمەوە ئاخۆ هۆكاری ئەم داگیركارییە پیاوانەیە چییە و چی پاڵیان پێوەدەنێ ئەم مافە بەخۆیان بدەن، كەسێك نەیتوانیوە دڵنیام بكات لەهۆكاری ئەوەی ئاخۆ من بۆچی لە فرە مێردی بێبەشم؟، ئێوەش دووبارە قەوانی ئەو پرسیارگەلە بەگوێچكەمدا بچرپێنن و هەمان ئەو بەهانانە بخەنە روو كە بەبڕوای ئەوان بەهانەی لەبارن.
گوتیان تۆ وەك ئافرەتێك لەرووی جەستەییەوە ناتوانی چوار پیاو بەیەكەوە كۆبكەیتەوە، منیش گوتم ئەو ئافرەتەی خیانەت لەهاوسەرەكەی دەكات و ئەوەی كۆڕی شەوانە سازدەكات لەوە زیاتر دەكات، بەڵێ دەتوانم، ئەمجارەیان گوتیان نەفس و دەروونی ئافرەت ئەوە نییە بتوانێ ئەم فرەییە مەیسەر بكات.
گوتم لەرووی سۆزو سۆزدارییەوە ئافرەت زۆری پێیە، ئەگەر پیاو بتوانێ دڵی بەچوار ژن بدات ئافرەتیش دەتوانێ، بەڵام سەبارەت بە دابەشكردنی رادەی ئەو سۆزە بەسەر پیاوەكاندا ئەوە ترشی ئەتۆمی DNA ئەم گرفتە یەكلا دەكاتەوە، بەڵام دوای ماوەیەك لەم ئەندێشەیە بیروخەیاڵم لەو چوارچێوەیەدا نەمایەوە كە منیش لاسایی پیاو بكەمەوە یاخود فرەژنی لێ قەدەغە بكەم، بەڵكو بەڕاستی بیروهزرم كەوتە سەر ئەوەی بیر لە فرەیی بكەمەوە كە ئێمەی ئافرەتان شەرم داماندەگرێ و لەوە دەسڵەمینەوە كە ئەوەی لەناخماندایە ئاشكرای بكەین و رایبگەیەنین .
ئەو فرەییەی كە لەسەرەتاكانی مرۆڤایەتی و سەردەمی ئەمەوییەكانەوە پەرەی سەند كە ئافرەت تیایدا (زعیم) سەركردەبووە، ئەو فرەییەی كەلەگەڵ رێكخستنی خێزان و دەركەوتنی كۆمەڵگەی پیاوسالاری و سەرەتاكانی سستەمی ئابووری و ویست وئارەزووی لەچنگكردنی (حصر) میرات و پاراستنی، لەپێناو ئەم هۆكارگەلەدا مرۆڤایەتی رێسای هاوسەرگیری هێنایە كایەوە.
ئایینەكانیش دوای ئەوە هاتن و پشتگیریان لەو رێسایەكرد لەروانگەی ئەوەی كە هاوسەرگیری پرۆسەیەكی بەرهەمهێنەری مەوەددەو رەحمەتە، واتە خۆشەویستی و بەزەییە و ئامرازێكی نانەوەی وەچەو پاراستنییەتی لە گێرەشێوێنی حەزو غەریزەكان، هەموو سوودەكانی كۆمەڵ بەوەوە واتە بەخێزانەوە بەندە، زۆر لە بەرژەوەندیەكانی هەندێك لایەن تەنها شتێك نەبێت كە رێكخەرەكان قسەیان لێ نەكردووە ئەویش بریتییە لەبەردەوام چێژوەرگرتن، هەروەها بەردەوامبوون لە حەزی پەلكێشبوون بۆ ناو خێزانێك كە لەپێناو رێكخستنی لایەنی سێكسی هاتۆتە كایەوە.
هەروەها دروستبوونی خێزان لەپێناو ئەوەشەوە هاتۆتە كایەوە بەرژەوەندییە مادییەكانی كۆمەڵگەش لەرووی ئابووری و رەوشتەوە بپارێزێ، بێگومان ئەویش بەپێی حەزی سروشتی نێوان نێرومێدا، بەڵام رێكخەرانی ئەو بوارە ئەوەیان لەبیرچووە كە پەیوەندی بە لایەنی جەستەییەوە هەیە، یەكێكە لەپرانسیپەكانی رۆژانەی هاوسەری، هۆكاری وەچە نانەوەیە، سەلماندنی پیاوەتییە، هەموو شتێكە تەنها گوشادو خۆشاوی جەستەیی و دەروونی نییە.
پیاوان دەڵێن: بێزاری داماندەگرێ، لەرووی ئەو حەزەی سەرەتاكانی هاوسەریمان بۆی ناجووڵێ، ماڵەكەم وەك كارگەیەك یاخود وەك دەزگایەكی لێهاتووە، خۆشەویستی لەبەرچاوان دیار نەما .
- ئایا بێزاربوون چارەنووسی ئاسایی هەموو ئافرەتێكە؟
ئەو لەوێوە دەستپێدەكات كە ئێمە بە (خیانەتكاری) ناوی دەبەین، ئەمیشیان لەفرەییەوە دەستپێدەكات لەبەر ئەوە نییە كە پیاو لەرووی رەوشتەو گرفتێكی هەیە، بەڵكو لەبەر ئەوەیە كە تاڕادەی نەخۆشكەوتن دەردی بێزاری لێی داوەو دابونەریت و ئایینزانەكانیش دەرمانی ئەو دەردەی بۆ دەستنیشان دەكەن.
بەڵام ئافرەت خۆی لەخیانەتكاری دەپارێزێت، ئەویش نەك لەبەر ئەوەی بێزاری لێی نزیك نابێتەوە، بەڵام لەبەرئەوەی دابونەریت كولتوور و فەرمان بەوە دەكەن كە لەماڵی خۆیدا دابنیشێ و (لاڵ) بێت، ئایا هەموو ژنێك لەكۆمەڵگا رۆژهەڵاتییەكانی ئێمەدا لەرووی سێكسییەوە تێرن؟ هەڵبەت نەخێر.
ئافرەت شەرم دایدەگرێ كە باس لە چێژی خۆی بكات لەگەڵ پیاوەكەی لەترسی ئەوەی نەك پیاوەكەی نەفرەتی لێ بكات و فریشتەكانیش بەهۆیەوە نەفرەتی لێ بكەن ئومێد دەكات ئەمكارە بیباتە بەهەشت.
(سیمۆن دی بوفوار) لەگەڵ (سارتەر) دا تا مردن لەپەیوەندی خۆشەویستیدا بوو بێ ئەوەی مارەشی بكات، سەرەڕای بێنەوبەردەكانیشیان، بەڵام هێشتا لەسەر ئەو هەستە پڕجۆشەی خۆشەویستی بەرانبەر بەیەكتری مابوون .
ئایا تاك گەرایی لەبنەڕەتە مرۆڤایەتییەكەیدا هەڵەیە؟ ئایا ژیان لەژێر بنمیچێكدا و بەیەكترنووسانێكی توند بەیەكترییەوە هۆكاری بێزارییە؟
لەبەرچاوونبوونی توخمی (تشویق)، ئایا راستە هەرچەند لاشەكان لەیەكتر دووربكەونەوە بەو ئەندازەیە حەزی لەیەكترنزیكبونەوەیان لا دروست دەبێت، ئەوەندەی لەیەكتریش نزیككەوتنەوە بەرادەی تێكەڵبوون و ئاوێتەبوونی رۆژانە رۆحی ئەو كەسانە لەیەكتر دوور دەكەونەوە؟ ئایا ئەوە هەڵەیە كە هەردوو بچنە ژێر سێبەری تاقە ماڵێك و ژیانێك بۆخۆیان بەسەر ببەن؟ ئایا لەبەرچی ئەو پەیوەندییە پتر بەردەوام دەبێت كە لەدەرەوەی چوارچێوەی هاوسەرگیریدا دەبەسترێ و ساڵانێك دەخایەنێ، كەچی هەركە دەچنە نێو پرۆسەكەوە هەموو ئەو هۆكارگەلەی بەیەكتری بەستاونەتەوە لەپڕێكدا لەبار دەچن؟
هەركە دەگوترێ (پەیوەندییان بە مارەبڕی كۆتایی هات) وەك ئەوە وایە كە نەمابێ و كۆتایی هاتبێ.
ئایا هەڵەیەك لەخودی پرۆسەی هاوسەرگیریدا هەیە؟ ئایا خودی گرێبەستی هاوسەرگیرییەكە هۆكارە كە هەستەكان بۆ سەر كاغەزێك دەگوازێتەوە كە دادگا بەپێی دوو شایەتحاڵ بڕیاری لەسەر دەدات بۆ ئەوەی هاوپەیمانییەك بێتەكایەوە كە پێویستە هاوپەیمانییەتییەكە رۆحی بێت بەرلەهەموو شتێك؟
ئایا هاوسەرگیری تێكەڵبوونی خۆشەویستی و ئارەزووی پەیوەستبوون بەیاساو رێساكانە؟، یاخود دەستتێوەردانی كەسوكارو بە مەرج گیران و بەدەستهێنانی رەزامەندی دەستەگەلێكی كۆمەڵگاو رێسا و جۆرەها شوێنەكانی خواپەرستییە كە رەنگە هەست و رۆح لەیەكتر جودا بكەنەوە ..
فرەیی بەرای زۆرێك بریتییە لەچارەسەركردنی گرفتی بێزاری و بێئومێدبوون و بەجێگەیاندنی حەزەكانی پیاو، بەڵام ئەگەر ئەمە تایبەت بێت بەپیاو و ژنی لێ بێبەش بكرێ ئەوكات دەبێتە جیاكاری.
بەڵام فرەیی بۆ هەموومان وەكو یەك یاخود هەوڵدان بۆ دروستكردنی نەخشەیەكی نوێی پرۆسەی هاوسەری. ئەمە تەنگژەی بێزاری چارەسەر دەكات و بەڵگەی تاهەتایەی پیاویش ناهێڵێ.
تا ئەوكاتەش پرسیارەكەم بەكراوەیی دەمێنێتەوە!